მწერალთა სახლი აცხადებს კონკურსს მოსწავლეებისთვის ლიტერატურისა და შემოქმედებითი წერის სახელოსნოში მისაღებად. სახელოსნოში მიიღებიან 13-15 წლის მოზარდები, რომელთაც აინტერესებთ და უყვართ მხატვრული ლიტერატურა.

სახელოსნოს გაუძღვებიან მწერალი და დრამატურგი, პრემია „საბას“ ლაურეატი დავით გაბუნია და მწერალი და მთარგმნელი, პრემია „საბას“ ლაურეატი ირმა ტაველიძე.
მოსწავლეები პედაგოგებთან ერთად წაიკითხავენ და განიხილავენ წიგნებს, გაეცნობიან ლიტერატურული ჟანრების წარმოშობის ისტორიას და თავისებურებებს, დაწერენ ესეებს და იმუშავებენ საკუთარ მხატვრულ ტექსტებზე.

გაკვეთილებს ექნება პრაქტიკული ხასიათი − ყოველკვირეული დავალებებითა და მრავალფეროვანი სავარჯიშოებით, რომლებიც ხელს შეუწყობს წერისა და დისკუსიის უნარების განვითარებას. ყოველი სასწავლო წლის ბოლოს მოსწავლეებს შესაძლებლობა ექნებათ საჯაროდ წარადგინონ საკუთარი ესეები და მხატვრული ტექსტები მწერალთა სახლში.
გაკვეთილები ჩატარდება კვირაში ორჯერ, 2 საათი. სწავლა დაიწყება პირველ მარტს და დასრულდება ივნისის ბოლოს. სასწავლო პროცესი განახლდება ოქტომბრიდან.
სახელოსნოში მოსწავლეები მიიღებიან კონკურსის საფუძველზე. საკონკურსო ესეები მიიღება 14 თებერვლამდე.